A Jane të vdekurit më të vërtetë të vdekur?

Vdekja mund të jetë një nga temat më të keqkuptuara sot. Për shumë, vdekja është e mbuluar me mister dhe ngjall tmerr, pasiguri dhe pashpresë. Të tjerë besojnë se të dashurit e tyre të vdekur nuk kanë vdekur fare, por në vend të kësaj jetojnë me ta ose në botë të tjera.

Miliona janë të hutuar në lidhje me marrëdhënien midis trupit, frymës (spirit) dhe shpirtit (soul). Por a ka vërtet rëndësi ajo që beson? Po, absolutisht! Ajo që beson për të vdekurit do të ketë një ndikim të thellë në atë që ndodh me ty në të ardhmen e afërt.

Nuk ka vend për hamendësim! Ky Udhëzues Studimi do të të japë pikërisht atë që thotë Zoti për këtë temë. Bëhu gati për një zbulim të vërtetë!

1. Së pari, kush e krijoi njeriun dhe çfarë ishte? 

   Zoti Perëndi formoi njeriun nga pluhuri i tokës dhe i fryu në vrima të hundës frymën e jetës; dhe njeriu u bë një qenie e gjallë (Zanafilla 2:7). Përgjigje: Zoti na bëri nga pluhuri në fillim.

2. Çfarë ndodh kur një person vdes? 

   Atëherë pluhuri do t’i kthehet tokës siç ishte, dhe fryma do t’i kthehet Perëndisë që e dha (Predikuesi 12:7). Përgjigje: Trupi kthehet përsëri në pluhur, dhe fryma kthehet te Perëndia, i cili e dha atë. Fryma (spirit) e çdo personi që vdes — qoftë i shpëtuar apo i pashpëtuar — kthehet te Perëndia në vdekje.

3. Çfarë është fryma (spirit) që kthehet te Perëndia pas vdekje? 

   Trupi pa frymën është i vdekur (Jakobi 2:26). Fryma e Perëndisë është në flegrat e mia të hundës (Jobi 27:3 KJV). 

   Përgjigje: Fryma që kthehet te Perëndia në vdekje është fryma e jetës. Askund në të gjithë librin e Zotit nuk thuhet që fryma ka ndonjë jetë, mençuri apo ndjenjë pasi një person vdes. Është fryma e jetës dhe asgjë më shumë.

4. Çfarë është një “shpirt” (soul)? 

   Zoti Perëndi formoi njeriun nga pluhuri i tokës dhe i fryu në vrima të hundës frymën e jetës; dhe njeriu u bë një shpirt i gjallë (Zanafilla 2:7 KJV). 

   Përgjigje: Një shpirt është një qenie e gjallë. Një shpirt është gjithmonë një kombinim i dy gjërave: trupi plus fryma. Një shpirt nuk mund të ekzistojë nëse trupi dhe fryma nuk janë të kombinuara. Fjala e Zotit mëson se ne jemi shpirtra (souls) — nuk kemi shpirtra.

5. A vdesin shpirtërat? 

   Shpirti (soul) që mëkaton, ai do të vdesë (Ezekieli 18:20

   .Çdo shpirt i gjallë që vdiq në det (Zbulesa 16:3 KJV). 

   Përgjigje: Sipas Fjalës së Zotit, shpirtërat vdesin! Ne jemi shpirtra, dhe shpirtërat vdesin. Njeriu është i vdekshëm (Jobi 4:17).Vetëm Zoti është i pavdekshëm (1 Timoteut 6:15 – 16). Koncepti i një shpirti të pavdekshëm, që nuk vdes, nuk gjendet në Bibël, e cila mëson se shpirtërat i nënshtrohen vdekjes.

6. A shkojnë njerëzit e mirë në qiell kur vdesin? 

   Të gjithë ata që janë në varre do të dëgjojnë zërin e Tij dhe do të dalin (Gjoni 5:28 – 29).Davidi është edhe i vdekur edhe i varrosur, dhe varri i tij është me ne deri në këtë ditë. Sepse Davidi nuk u ngjit në qiej (Veprat 2:29, 34).Nëse pres, varri është shtëpia ime (Jobi 17:13

   Përgjigje: Jo. Njerëzit nuk shkojnë në qiell ose në ferr në vdekje. Ata nuk shkojnë askund — por presin në varret e tyre për ringjalljen.

7. Sa di apo kupton dikush pas vdekjes? 

   Të gjallët e dinë se do të vdesin; por të vdekurit nuk dinë asgjë, dhe nuk kanë më shpërblim, sepse kujtimi i tyre është harruar. Gjithashtu dashuria e tyre, urrejtja e tyre dhe zilia e tyre tani kanë humbur; kurrë më nuk do të kenë një pjesë në asgjë që bëhet nën diell. Nuk ka as punë, as projekt, as njohuri, as mençuri në varr ku po shkon (Predikuesi 9:5, 6, 10). Të vdekurit nuk e lavdërojnë Zotin (Psalmi 115:17).

   Përgjigje: Zoti thotë se të vdekurit nuk dinë absolutisht asgjë!

8. Por a nuk mund të komunikojnë të vdekurit me të gjallët, dhe a nuk janë të vetëdijshëm për atë që po bëjnë të gjallët? 

   Njeriu shtrihet dhe nuk ngrihet. Derisa qiejt të mos jenë më, ata nuk do të zgjohen as nuk do të çohen nga gjumi i tyre. Bijtë e tij nderohen, dhe ai nuk e di; ata poshtërohen, dhe ai nuk e percepton (Jobi 14:12, 21).Kurrë më nuk do të kenë një pjesë në asgjë që bëhet nën diell (Predikuesi 9:6). 

   Përgjigje: Jo. Të vdekurit nuk mund të kontaktojnë të gjallët, dhe as nuk dinë se çfarë po bëjnë të gjallët. Ata janë të vdekur. Mendimet e tyre kanë humbur (Psalmi 146:4.

9. Jezusi e quajti gjendjen e pavetëdijshme të të vdekurve gjumë tek Gjoni 11:11–14. Sa do të flenë ata? 

   Njeriu shtrihet dhe nuk ngrihet. Derisa qiejt të mos jenë më (Jobi 14:12). Dita e Zotit do të vijë në të cilën qiejt do të kalojnë (2 Pjetrit 3:10). 

   Përgjigje: Të vdekurit do të flenë deri në ditën e madhe të Zotit në fund të botës. Në vdekje njerëzit janë totalisht të pavetëdijshëm, pa asnjë veprimtari apo njohuri të asnjë lloji. Nuk kemi asnjë rast të styre që Jezusi ringjalli që të dëshmonte ndonjë gjë pas vdekje apo peridhës që ata qëndruar të vdekur. 

10. Çfarë u ndodh të drejtëve të vdekur në ardhjen e dytë të Krishtit? 

    Ja, unë vij shpejt, dhe shpërblimi im është me mua, për t’i dhënë gjithsecilit sipas veprës së tij (Zbulesa 22:12).Vetë Zoti do të zbresë nga qielli me një thirrje. Dhe të vdekurit në Krisht do të ngrihen. Dhe kështu do të jemi gjithmonë me Zotin (1 Thesalonikasve 4:16, 17).Të gjithë do të ndryshohemi — në një çast, sa hap e mbyll sytë… dhe të vdekurit do të ringjallen të paprishur. Sepse kjo e prishme duhet të veshë paprishjen, dhe kjo e vdekshme duhet të veshë pavdekshmërinë (1 Korintasve 15:51–53).

    Përgjigje: Ata do të shpërblehen. Ata do të ringjallen, do t’u jepen trupa të pavdekshëm dhe do të merren për të takuar Zotin në ajër. Nuk do të kishte asnjë qëllim për një ringjallje nëse njerëzit do të merreshin në qiell pas vdekjes.

11. Cila ishte gënjeshtra e parë e djallit në Tokë? 

    Gjarpri i tha gruas: “Nuk do të vdisni me siguri” (Zanafilla 3:4). Ai gjarpër i vjetër, që quhet Djall dhe Satan (Zbulesa 12:9). 

    Përgjigje: Nuk do të vdisni.

12. Pse e gënjeu djalli Evën për vdekjen? A mund të jetë kjo temë më e rëndësishme nga sa mendojmë?

    Përgjigje: Gënjeshtra e djallit se ne nuk do të vdesim është një nga shtyllat e mësimeve të tij. 

    Për mijëra vjet, ai ka bërë mrekulli të fuqishme, mashtruese për të mashtruar njerëzit duke i bërë të mendojnë se po marrin mesazhe nga shpirtrat e të vdekurve. (Shembuj: Magjistarët e Egjiptit — Eksodi 7:11; Gruaja e Endorit — 1 Samuelit 28:3–25; Magjistarët — Danieli 2:2; Një skllave — Veprat 16:16–18.)

Një Paralajmërim Solemn

Në të ardhmen e afërt, Satani do të përdorë përsëri magjinë — ashtu siç bëri në ditën e profetit Daniel — për të mashtruar botën (Zbulesa 18:23). Magjia është një agjenci mbinatyrore që pretendon se merr fuqinë dhe mençurinë e saj nga shpirtrat e të vdekurve.

Duke U Paraqitur si Dishepujt e Jezusit

Duke u paraqitur si të dashur të perëndishëm që kanë vdekur, klerikë të shenjtë që tani janë të vdekur, profetë të Biblës, apo edhe apostujt e Krishtit (2 Korintasve 11:13), Satani dhe engjëjt e tij do të mashtrojnë miliarda. Ata që besojnë se të vdekurit janë gjallë, në çfarëdo forme, ka të ngjarë të mashtrohen.

13. A bëjnë djajtë vërtet mrekulli? 

    Sepse ata janë shpirtra djajsh, që bëjnë mrekulli (Zbulesa 16:14.Krishtëra të rremë dhe profetë të rremë do të ngrihen dhe do të shfaqin shenja dhe mrekulli të mëdha, për të mashtruar, nëse është e mundur, edhe të zgjedhurit (Mateu 24:24). 

    Përgjigje: Po, në të vërtetë! Djajtë bëjnë mrekulli tepër bindëse (Zbulesa 13:13 – 14). Satani do të shfaqet si një engjëll drite (2 Korintasve 11:14) dhe, edhe më tronditëse, si vetë Krishti (Mateu 24:23 – 24). Ndjenja universale do të jetë se Krishti dhe engjëjt e Tij po udhëheqin një ringjallje fantastike në mbarë botën. Theksi i tërë do të duket aq shpirtëror dhe do të jetë aq mbinatyror saqë vetëm të zgjedhurit e Zotit nuk do të mashtrohen.

14. Pse populli i Zotit nuk do të mashtrohet? 

    Ata e pritën fjalën me gjithë gatishmëri dhe shqyrtuan Shkrimet çdo ditë për të parë nëse këto gjëra ishin kështu (Veprat 17:11).Nëse ata nuk flasin sipas kësaj fjale, kjo është sepse nuk ka dritë në ta (Isaia 8:20). 

    Përgjigje: Populli i Zotit do të dijë nga studimi i Librit të Tij se të vdekurit janë të vdekur, jo gjallë. Ata do të dinë se një shpirt që pretendon të jetë një i dashur i vdekur është në të vërtetë një djall! Populli i Zotit do të refuzojë të gjithë mësuesit dhe punëtorët e mrekullive që pretendojnë të marrin dritë të veçantë ose të bëjnë mrekulli duke kontaktuar shpirtrat e të vdekurve. Dhe populli i Zotit po ashtu do të refuzojë si të rrezikshme dhe të rreme të gjitha mësimet që pretendojnë se të vdekurit janë gjallë në çfarëdo forme, kudo.

15. Në ditën e Moisiut, çfarë urdhëroi Zoti t’u bëhej njerëzve që mësonin se të vdekurit ishin gjallë? 

    Një burrë ose një grua që është medium, ose që ka shpirtra të njohur, do të vritet patjetër; ata do t’i vrasin me gurë (Levitiku 20:27). 

    Përgjigje: Zoti këmbënguli që mediumet dhe të tjerët me shpirtra të njohur (që pretendonin se ishin në gjendje të kontaktonin të vdekurit) të vriteshin me gurë. Kjo tregon se si e konsideron Zoti mësimin e rremë se të vdekurit janë gjallë.

16. A do të vdesin përsëri njerëzit e drejtë që ringjallen në ringjallje? 

    Ata që janë gjetur të denjë për ta arritur atë epokë, dhe ringjalljen prej të vdekurve… as nuk mund të vdesin më (Luka 20:35 – 36). Perëndia do të thajë çdo lot nga sytë e tyre; nuk do të ketë më vdekje, as pikëllim, as të qara. Nuk do të ketë më dhimbje, sepse gjërat e mëparshme kanë kaluar (Zbulesa 21:4). 

    Përgjigje: Jo! Vdekja, pikëllimi, të qarat dhe tragjedia nuk do të hyjnë kurrë në mbretërinë e re të Zotit. Kur kjo e prishme të ketë veshur paprishjen, dhe kjo e vdekshme të ketë veshur pavdekshmërinë, atëherë do të përmbushet fjala që është shkruar: ‘Vdekja është gëlltitur në fitore’ (1 Korintasve 15:54).

17. Besimi në riinkarnim po zgjerohet me shpejtësi sot. A është ky mësim biblik? 

    Të gjallët e dinë se do të vdesin; por të vdekurit nuk dinë asgjë. Kurrë më nuk do të kenë një pjesë në asgjë që bëhet nën diell (Predikuesi 9:5, 6).

    Përgjigje: Pothuajse gjysma e njerëzve në tokë besojnë në riinkarnimin, një mësim se shpirti (soul) nuk vdes kurrë, por në vend të kësaj rilind vazhdimisht në një lloj tjetër trupi me çdo brez pasues. Ky mësim, megjithatë, është në kundërshtim me Shkrimet.

Bibla Thotë

Pas vdekjes një person: kthehet në pluhur (Psalmi 104:29), nuk di asgjë (Predikuesi 9:5), nuk zotëron asnjë fuqi mendore (Psalmi 146:4), nuk ka asgjë të bëjë me asgjë në tokë (Predikuesi 9:6), nuk jeton (2 Mbretërve 20:1), pret në varr (Jobi 17:13), dhe nuk vazhdon (Jobi 14:1 – 2).

Shpikja e Satanit

Mësuam në pyetjet 11 dhe 12 se Satani shpiku mësimin se të vdekurit janë gjallë. Riinkarnimi, kanalizimi, komunikimi me shpirtrat (spiritizmi), adhurimi i shpirtrave dhe “shpirti i pavdekshëm” janë të gjitha shpikje të Satanit, me një qëllim — për t’i bindur njerëzit se kur vdes, ti nuk je vërtet i vdekur. Kur njerëzit besojnë se të vdekurit janë gjallë, “shpirtra djajsh, që bëjnë mrekulli” (Zbulesa 16:14) dhe që paraqiten si shpirtra të të vdekurve do të jenë në gjendje t’i mashtrojnë dhe t’i çojnë në rrugë të gabuar praktikisht 100 për qind të kohës (Mateu 24:24).

Pyetje Për Reflektim

1. A nuk shkoi në parajsë hajduti që ishte në kryq me Kristin në ditën që ai vdiq? 

   Jo. Në fakt, të dielën në mëngjes Jezusi i tha Marisë: “Unë nuk jam ngjitur ende te Ati Im” (Gjoni 20:17). Kjo tregon se Krishti nuk shkoi në qiell në vdekje. Është e rëndësishme të theksohet se pikësimi që shohim në Bibël sot nuk është origjinal, por i shtuar shekuj më vonë nga përkthyesit. Presja tek Luka 23:43 do të ishte vendosur më mirë pas fjalës sot sesa para, në mënyrë që pasazhi të lexohet: “Me të vërtetë po të them sot, ti do të jesh me mua në Parajsë.” Një mënyrë tjetër për ta thënë këtë varg që ka kuptim në kontekstin e menjëhershëm është: Po të them sot — kur duket se unë nuk mund të shpëtoj askënd, kur Unë Vetë po kryqëzohem si kriminel — Unë të jap sigurinë sot, që ti do të jesh me mua në Parajsë. Mbretëria e lavdisë së Krishtit do të vendoset në ardhjen e Tij të dytë (Mateu 25:31), dhe të drejtët e të gjitha epokave do të hyjnë në të në atë kohë (1 Thesalonikasve 4:15 –17) dhe jo në vdekje.

2. A flet Bibla për shpirtin (soul) e pavdekshëm? 

   Jo. Shpirti (soul) i pavdekshëm, që nuk vdes, nuk përmendet në Bibël. Fjala i pavdekshëm gjendet vetëm një herë në Bibël, dhe i referohet Perëndisë (1 Timoteut 1:17).

3. Në vdekje trupi kthehet në pluhur dhe fryma (spirit, ose frymëmarrja) kthehet te Perëndia. Por ku shkon shpirti (soul)?

   Nuk shkon askund. Në vend të kësaj, thjesht pushon së ekzistuari. Dy gjëra duhet të kombinohen për të bërë një shpirt: trupi dhe fryma. Kur fryma largohet, shpirti pushon së ekzistuari sepse është një kombinim i dy gjërave. Kur fik dritën, ku shkon drita? Nuk shkon askund. Ajo thjesht pushon së ekzistuari. Dy gjëra duhet të kombinohen për të bërë një dritë: një llambë dhe energjia elektrike. Pa kombinimin, drita është e pamundur. Kështu është edhe me shpirtin; nëse trupi dhe fryma nuk janë të kombinuara, nuk mund të ketë shpirt. Nuk ka asgjë të tillë si një shpirt pa trup.

4. A do të thotë fjala shpirt (soul) ndonjëherë diçka tjetër përveç një qenieje të gjallë? 

   Po. Mund të nënkuptojë gjithashtu (1) vetë jetën, ose (2) mendjen, ose intelektin. Pavarësisht se cili kuptim synohet, shpirti është ende një kombinim i dy gjërave (trupi dhe fryma) dhe pushon së ekzistuari pasi vdes.

5. A mund të shpjegoni Gjonin 11:26: “Kushdo që jeton dhe beson në mua nuk do të vdesë kurrë?”

   Kjo i referohet jo vdekjes së parë, që të gjithë njerëzit vdesin (Hebrenjve 9:27), por vdekjes së dytë, që vdesin vetëm të ligjtë dhe nga e cila nuk ka ringjallje (Zbulesa 2:11; 21:8).

6. Mateu 10:28 thotë: “Mos kini frikë nga ata që vrasin trupin, por nuk mund ta vrasin shpirtin.” A nuk e provon kjo që shpirti (soul) është i pavdekshëm? 

   Jo. Ajo provon të kundërtën. Gjysma e fundit e të njëjtit varg provon se shpirtërat vdesin. Ajo thotë: “Më tepër kini frikë nga Ai që është në gjendje të shkatërrojë edhe shpirtin edhe trupin në Gehena.” Fjala shpirt këtu do të thotë jetë dhe i referohet jetës së përjetshme, e cila është një dhuratë (Romakëve 6:23) që do t’u jepet të drejtëve në ditën e fundit (Gjoni 6:54). Askush nuk mund ta heqë jetën e përjetshme që dhuron Zoti. (Shih edhe Luka 12:4 – 5.)

7. A nuk thotë 1 Pjetrit 4:6 se ungjilli u predikua njerëzve të vdekur? 

   Jo. Ajo thotë se ungjilli u predikua atyre që janë të vdekur. Ata janë të vdekur tani, por ungjilli u predikua atyre ndërsa ata ishin ende gjallë.